جريدة الأقلام الدولية International pens newspaper

 رايد وطن

…..

تنزف تره اجروح الوطن

ياهو اليضمد اجروحه

وياهو الينشف دمعته

وياهو اليسكت نوحه

وياهو اليرجع هيبته

ويفديه ابدمه وروحه

ياموطني عذرا تره أمنه بيهم لاﭼـن

خانوك وسنون الحقد گطعن بيك ولاﭼـن

ولهذا شعبك ياوطن ماگعد لحظه ولاﭼـن

گام وفزعلك ياوطن رايد يعلي اصروحك

وبرموش عينه ياوطن رايد يضمد اجروحك

وبصرخة اللا للظلم رايد يسكت نوحك

وبروحه شعبك ياوطن رايد يردلك روحك

رايد وطن صاح الشعب افديه بدمي وروحي

وبتراب گاعه امن انجرح كون آنه أضمد اجروحي

رايد وطن بـي انسعد بي أنسه همي ونوحي

رايد وطن مابي ظلم مابي نفاق ولاهم

رايد وطن بي ننجمع كل احنه وبحب نلتم

رايد وطن .. بخبيزته طعم الملح

       مو خبزه مديوفه ٳبسم 

رايد وطن خيره يعم كل الشعب 

         وأولاده بس بي تنعم 

رايد وطن ريحة مسـﭺ بترابه كون ٲنه اشتم

رايد اشم ريحة وطن ماريد اشم ريحة دم

رايد وطن بس بي أهم وبغيره ماريد اهتم

رايد وطن بس بي أهم وبغيره ماريد اهتم

بقلم

مشكور نعيم الطائي

 ابو طيبة الطائي