جريدة الأقلام الدولية
International pens newspaper
( صرخة متظاهر شاب نال شرف الشهادة )
نعيم الطائي
ابو طيبة الطائي
مو كافي ابدربنه اتفوت
من گد ماتمر بينه .. تعبت السـﭼـﭺ
والمله والزاتوت
لا يالموت .. لا يالموت
بحضان الوطن نحلم نغمض العين
موش بلوحة التابوت
لا يالموت .. لا يالموت
بعدنه ورود .. وبعد وكت الوداع
أوي الوطن مالاح
نريد انعيش .. مانسمع بواﭼـي
ولا نريد اصياح
احنه نعيش مرتاحين ..
لو شفنه الوطن مرتاح
نريد انشوف ابن اربيل والبصره
اخيوه بلا هدد وسلاح
ونريد ابن الرمادي ايصير
حارس للوطن ورماح
وابن تكريت وديالۍ .. وابن بغداد والحله
نوارس والسماوه اجناح
وإبن الموصل وكركوك .. وي ذي قار
وإبن الكوت سنبل والنجف فلاح
ونريد بكربله وبدهوك ..
نرفع راية الاصلاح
ونريد إبـن الديوانيه
لكل مجبل عطر قداح
اي يالموت .. بعدنه ازغار .. صح ازغار
بس عدنه حلم ثوار
(حلم ﭼـنه نحلمه بلا حـﭼـي وبسكوت)
إنخلص هالوطن من قبضة الطاغوت
وأخذ شتريد .. اي يالموت اخذ مبخوت
بس يفرح وطنه .. وينتهي الطاغوت
مرخوص ابدربنه اتفوت
وتعبها السـﭼـﭺ والمله والزاتوت
اي يالموت .. اي يالموت
جريدة الأقلام الدولية International pens newspaper 
أضف تعليق