(ملف سري)
احمد فشلان الوائلي
العب ويالموت وازغر
تلگه باچر
گبل لا ينباگ راسك
ارجع ارسم
رد شمس عالماي يتمشط ضواها
كحل احمر
اعبر بحزنك نهر… مكتوب توصل
بوس روحك
حب سمارك
طيح غنوه
سافر ابيض
واصعد إحچاية ملح
وهلال دگ روحك وعيش انسان
انت تدري
دمك السجه الغفة بيها الخناجر
والمحطات ومفاتيح السراديب وبردها
قبر سري..!
الخبر ببيوت الخفافيش وملفات الشوارع والاسامي اتراب اسود
ممر اظلم
قفل بالبيبان اسود
راس يندگ
ثوب ينشگ
اخر امرايات حزنك ظرف بارد..!!
ملف سري
ومسرحية..!
الكرسي ناسك
اشطب اسمك
اقره راسك
والرساله احبال واثياب الشمس عنگود من اخر اولايه
ضوه اخر بيت اسود
گبال خوفك باب ما دگتها روحك
يمها مصلوبه الجناسي
وخمره من طين العگود البارده
بأخر الشارع..!
ماي راگد
ضحك بارد
ودرج يصعد بيك لاخر جمجمه بتراب حزنك
بين شباچ وحبل واطفال تبچي
تسمع الصرخات والريح التجيب الصوت والساعة التبوگ الروح دگت.!!
والملفات التسافر بيك جنسيه غريبه..!!
صوت ذيب
راس فوگه اندگ صليب
وحزنك الما يقبل يرسمك مدينه..
حسرة الگيعان دمك
ليش ترخص
ليش تقبل عالرفوف ايبات خوفك
فوگ من لونك شعب والگاع جيب..!
الشمس زرعك
واليجن ويه المطر للشوگ مفتاح البريد الگاع نجمه
فتش البردان تلگه الچف صلاته
چلمة الطين المشت بترابه جذبه ملف بايت
عيش ميت
موت تضحك
راسك اولايات والبيبان والبير وملفات الحديد
اتراب عرسك..
جريدة الأقلام الدولية International pens newspaper 
أضف تعليق