حاتم أحمد الهاشمي
كلشي البيك غالي بس رخيص الدم
وكلشي البيك هم امركب اعله الهم
ورغم هذا احبك ياعراق الخير
وآنه المجبور احبك أنته أب وعم
آنه بدونك أحس بالنهر صحرة يصير
وآنه بدونك احس وجه الشمس أظلم
ياأول وطن حط ثاية بالتاريخ
يل بحرفك الكون تنوَّر اتعلم
يلمكثر جروحي وحيل الك مرتاح
يلمورِّث كبودي وچن بخور اشتم
يل توزع حنان اعله الغرب والجار
وآنه وليدك حرام بخيرك اتنعم
واني اللي نطيت ألعلم أحمر لون
سيف اعداك والله بضلعي وتثلم
وأني العشت يمك ماتركتك دوم
ورافگتك سوار أمرافگ المعصم
اشد بطني امنجوع وماشكيت بيوم
وآنه الجبت العمر بحزامك محزم
على حدودك وگفت اسنين انطر بيك
اطش روحي اعله حدك وأرد اتلملم
جبتها وياك عاشگ مغرم بمعشوگ
واكتبلك أشعار الهايم المغرم
امنريد اطلع بگاعك انخبص واحتار
البسلك اشكال وحيل أتهندم
مثل واحد يحب او واعد المحبوب
گدام المراية شكثر يترهم
واشو هسه صفت للخاين وللعاق
للباعك رخيص وخربط وأجرم
واشو هسه ال شراك امهمش ومچتوف
ول ذَبّحْ اولادك أصبح أمقدّم بقلم
حاتم أحمد الهاشمي
جريدة الأقلام الدولية International pens newspaper 
أضف تعليق